இயேசுவைப் பின்பற்றுவது, கிறிஸ்மஸ் ஒளியைப் பின்பற்றுவதாகும்

டிச.26,2016. தன் வாழ்வையே வழங்கிய தியாகத்தின் வழியாக விட்டுச் சென்ற சாட்சியத்தை நாம் எடுத்துக்கொள்ள, புனித ஸ்தேவான் அழைப்பு விடுக்கும் இந்நாளில், கிறிஸ்மஸின் மகிழ்ச்சி நம் இதயங்களை மீண்டும் நிறைக்கிறது என இத்திங்களன்று வழங்கிய மூவேளை செப உரையில் எடுத்துரைத்தார் திருத்தந்தை பிரான்சிஸ்.

திருஅவையின் முதல் மறைசாட்சியான புனித ஸ்தேவான் விழா, கிறிஸ்து பிறப்பு பெருவிழாவுக்கு அடுத்த நாளான இத்திங்களன்று இடம்பெற்றதை முன்னிட்டு மூவேளை செப உரை வழங்கிய திருத்தந்தை பிரான்சிஸ் அவர்கள், இயேசுவின் பெயரால் கிறிஸ்தவர்கள் வெறுக்கப்படுவர், ஏனெனில், இருளில் தன் பாவங்களை மறைக்க முயலும் உலகம், இயேசு கொணர்ந்த ஒளியைக் கண்டு அஞ்சுவதே, இதற்கு காரணம் என்று கூறினார்.இவ்வுலகின் இருளை விட்டு விட்டு, கிறிஸ்மஸ் இரவு கொணர்ந்த ஒளியைப் பின்பற்றுவது என்பது, இயேசுவைப் பின்பற்றுவதாகும் எனவும் தன் மூவேளை செப உரையில் கூறினார் திருத்தந்தை.வாழ்வு மற்றும் ஒளியின் பாதையை தேர்ந்தெடுப்பதற்கு நமக்கு அழைப்பு விடுக்கும் இயேசுவின் மீது தன் விசுவாசத்தை அறிக்கையிட்டதால், புனித ஸ்தேவான், மறைசாட்சியாக கொல்லப்பட்டார் என்று கூறியத் திருத்தந்தை பிரான்சிஸ் அவர்கள், உண்மையை தேர்ந்துகொண்டதால், உலகின் தீமைக்கு புனித ஸ்தேவான் பலியானாலும், இறுதியில் கிறிஸ்துவே வெற்றிவாகைச் சூடினார் என்றார்.

இன்றும் திருஅவை, ஒளிக்கும் வாழ்வுக்கும் சான்று பகரும் பணியில், பல்வேறு சித்ரவதைகளை, மறைசாட்சிய மரணம் வரையில் அனுபவித்து வருகின்றது  என்பதையும் சுட்டிக்காட்டிய திருத்தந்தை பிரான்சிஸ் அவர்கள், அனைத்து சித்ரவதைகளையும் தாங்கி உறுதியுடன் சான்று பகர்ந்து வரும் கிறிஸ்தவர்கள், உண்மையில் பிறரன்பின் சான்றாகவும் வாழ்கிறார்கள் என்று கூறினார்.இவ்வாறு, தன் மூவேளை செப உரையை வழங்கியத் திருத்தந்தை, இந்நாட்களில் தனக்கென வாழ்த்துக்களை அனுப்பிய அனைவருக்கும், குறிப்பாக செபம் எனும் பரிசை வழங்கிய அனைவருக்கும் தன் நன்றியையும் வெளியிட்டார்.

ஆதாரம் : வத்திக்கான் வானொலி

ஒளிவிழா - 2016

18-12-2016 அன்று இத்தாலி தமிழர் ஆன்மீகப்பணியகத்தின் பலெர்மோ ஆன்மீகத்தளத்தின் ஒளிவிழா நிகழ்வானது கோல்டன் திரையரங்கில் நடைபெற்றது. இவ்விழாவிற்கு பிரதம விருந்தினராக இலங்கையிலிருந்து வருகை தந்த அருட்பணி. யோசப்ராஜ் கிளேயர் அ.ம.தி அடிகளார் கலந்து கொண்டார். இவர் தனது உரையில் தீவனத்தொட்டியில் வாழ்வளிக்கும் உணவாகவும், ஒளியாகவும் பிறந்த இயேசு எல்லோருக்கும் ஊட்டம் அளித்ததைப்போன்று  நாமும் மற்றவர்களுக்கு ஊட்டம் கொடுக்க வேண்டுமென்று கூறிக்கொண்டார்.  சிறப்ப விருந்தினராக வருகை தந்திருந்த பலெர்மோ மாநகர மேஜர் ஒர்லாந்தே அவர்கள் நீங்கள் இலங்கைத்தமிழர்களாய் இருந்தாலும் பலெர்மோ மக்கள் தான். உங்கள் ஆன்மீக இயக்குனரின் வழிகாட்டலில் இன்னும் எழுச்சி பெற ஆசிக்கின்றேன். ‘2017ஆம் ஆண்டு இளைஞர் ஆண்டாக பிரகடனம் செய்யப்பட்டிருக்கும் இவ்வேளையில் முன்னெடுக்கப்படும் அனைத்து விடயங்களிலும் தமிழ் இளைஞர்கள் பங்குபற்ற வேண்டுமென அழைப்பு  விடுத்தார்.
நடனங்கள், நாடகங்கள், தென்மோடி நாட்டுக்கூத்து என பல வகையான தமிழர் பாரம்பரிய கலை நிழ்வுகளும் சிறப்பாக நடைபெற்றது. 
   

திருத்தந்தை : இன்றைய உலகம் பதட்டநிலைகளால் நிறைந்துள்ளது

டிச.03,2016. இன்றைய உலகம் பதட்டநிலைகளால் நிறைந்திருந்தாலும், நம்பிக்கையின் கீற்றுகளும் தெரிகின்றன என்று, திருத்தந்தை பிரான்சிஸ் அவர்கள், நூற்றுக்கணக்கான தொழில் அதிபர்களிடம், இச்சனிக்கிழமையன்று கூறினார்.Fortune, TIME ஆகிய இரு இதழ்களும் இணைந்து, “21ம் நூற்றாண்டு சவால் : தாக்கங்களை உருவாக்கும் புதிய ஒப்பந்தங்களை நோக்கி..” என்ற தலைப்பில், உரோம் நகரில் நடத்திய இரண்டு நாள் பன்னாட்டு கருத்தரங்கில் கலந்துகொண்ட 400க்கும் மேற்பட்ட பிரதிநிதிகளை, இச்சனிக்கிழமையன்று, வத்திக்கானின் கிளமெந்தினா அறையில் சந்தித்து உரை நிகழ்த்திய திருத்தந்தை, இவ்வாறு கூறினார்.இன்றைய உலகில், மக்கள் மத்தியில் சமத்துவமற்ற நிலை தொடர்ந்து விரிந்துகொண்டே செல்கின்றது என்றும், போர், வறுமை மற்றும் இவற்றால் மக்கள் புலம்பெயர்ந்தல் போன்ற காரணங்களால், பல சமூகங்கள் நேரிடையாகப் பாதிக்கப்பட்டுள்ளன மற்றும், இம்மக்கள்  தங்களின் அச்சங்களையும், கவலைகளையும் வெளிப்படுத்துகின்றனர் என்றும், இவர்கள் தங்களின் குரல் கேட்கப்பட வேண்டுமென்று விரும்புகின்றனர் என்றும் எடுத்துரைத்தார் திருத்தந்தை பிரான்சிஸ்.

இம்மக்களின் நம்பிக்கையாக, இந்தப் பிரதிநிதிகள் உள்ளனர் என்றும், உலக அளவில் நிலவும் அநீதிகளைக் களைவதே, நமது பெரிய சவால் என்றும் கூறிய திருத்தந்தை,  அநீதிகளைக் களையும் முயற்சிகளில், எவரும் ஒதுக்கப்பட்டுவிடக் கூடாது என்றும் கேட்டுக்கொண்டார். நம் நிறுவனங்கள் மற்றும், பொருளாதார அமைப்புக்களை மாற்றுவதற்கு, Fortune-TIME உலகளாவிய அமைப்பு தொடங்கியுள்ள பணிகள், தொடர்ந்து இடம்பெறுமாறு அழைப்பு விடுத்த திருத்தந்தை, இந்த முயற்சியில், இவர்கள் எதிர்பார்க்கும் மக்களிடமிருந்து உதவி கிடைக்கட்டும் என வாழ்த்தினார்.Fortune Live Media மற்றும் TIME நிறுவனம் நடத்திய இக்கருத்தரங்கில், Fortune நிறுவனத்திலிருந்து 500 பேர் மற்றும் TIME நிறுவனத்திலிருந்து 100 பேர் கலந்துகொண்டனர் எனக் கூறப்பட்டுள்ளது.அதிகமதிகமான வேலை வாய்ப்புகளை உருவாக்குதல், வளங்கள் பரந்த அளவில் பகிரப்படல், வறுமையை ஒழிப்பதற்கு நீடித்த, நிலையான நடவடிக்கைகள் போன்றவற்றுக்கு, திருத்தந்தை பிரான்சிஸ் அவர்கள் விடுத்த அழைப்பை ஏற்று, இந்த நிறுவனங்கள், இம்முயற்சியில் இறங்கியுள்ளன என்று அறிவிக்கப்பட்டுள்ளது.ஏழ்மையை ஒழிப்பதோடு தொடர்புடைய, தொழில்நுட்பம், வேலை வாய்ப்புகள், உணவு, தண்ணீர், சுற்றுச்சூழல், எரிவாயு போன்ற தலைப்புக்கள், இக்கூட்டத்தில் கலந்துரையாடப்பட்டன.

ஆதாரம் : வத்திக்கான் வானொலி

Contact Info

Via Bari N° 44
90133 Palermo
Italy

+39 3894205524
+39 0915072322