வாழ்த்துகின்றோம்.

யாழ் மாகாண அமலமரித்தியாகிகள் குழமத்தின் திருத்தொண்டராகிய அருட்சகோதரர்.பீட் சுஜாகரன் அ.ம.தி அவர்கள் யாழ் மறைமாவட்ட ஆயர் மேதகு. ஜஸ்ரின் பேணாட் ஆண்டகை அவர்களால் இன்று யாழ் மரியன்இனை பேராலயத்தில் குரவாக அருட்பொழிவு செய்யப்பட்டுள்ளார். இப்புதிய குரவிற்கு இத்தாலி தமிழர் ஆன்மீகப்பணியக இறைமக்கள் தங்கள் இதயம் கனிந்த வாழ்த்துக்களைக் கூறிக்கொள்கின்றார்கள். இவர் கடந்த காலங்களில் உரோமையில் கல்வி கற்ற போது எமது ஆன்மீகத்தளத்திற்கு வருகைதந்து எமக்கு பல்வேறு வழிகளில் உதவியிருக்கின்றார் என்பதனை நன்றியோடு நினைவு கூருகின்றறோம். இவர் இறையாசீரோடு இறைபணியினை சிறப்பாக ஆற்றிட எமது செபத்தில் தொடர்ந்து வேண்டுகின்றோம்.
 

பொங்கல் விழா

15-01-2017 அன்று இத்தாலி தமிழர் ஆன்மீகப்பணியகத்தின் பலெர்மோ தள இறைமக்கள் தங்கள் பொங்கல் விழாவினை சன் நிக்கோலா ஆலயத்தில் ஞாயிறு திருப்பலியுடன் சிறப்பாக கொண்டாடி மகிழ்ந்தனர். 
தமிழர் பண்பாட்டு வரவேற்பு முறையில் பன்னீர் தெளித்து, சந்தனப்பொட்டு வைத்து அனைத்து இறைமக்களும் ஆலயத்திற்குள் வரவேற்கப்பட்டு, தொடர்ந்து மாலையிடுதல், குத்துவிளக்கேற்றல், வரவேற்பு கலசம் கொண்ட நடனம், என தமிழர் பாரம்பரியத்துடன் திருப்பலி ஆரம்பமாகியது. 
திருப்பலியினை அருட்பணி. இம்மானுவேல் அடிகளாரும், எமது ஆன்மீக இயக்குனரும் இணைந்து நிறைவேற்றினார்கள். 
அருட்பணி. இம்மானுவேல் அடிகளார் தனது மறையுரையில் “.நாம் தமிழர்களாக விருப்பி பிறக்கவில்லை. கடவுளின் திட்டப்படியே பிறந்துள்ளோம். எமது பேசும் மொழி தமிழாக இருப்பதும் இறை சித்தமே. முதலில் தமிழர்களாக பிறந்தோம். பின்பு திருமுழுக்கு பெற்று கிறிஸ்தவர்களாக மாறினோம். எனவே நாம் தமிழ்க்கிறிஸ்தவர்கள். ஆகவே நாம் எம் பண்பாடுகள், கலாச்சாரங்களை பின்பற்றுவதில் தவறில்லை. தமிழர்களுக்கு உரிய சாதியம், பிரதேசவாசதம், ஆண் ஆதிக்கம் போன்ற கழிவுகளை அகற்றி, கிறிஸ்து காட்டிய சமத்துவம், ஒற்றுமை, மன்னிப்பு, ஆகிய நற்பண்புகளோடு வாழ்வதே தமிழ்க்கிறிஸ்தவர்களது கடமையாகும். திருச்சபையானது மறைபரப்புப்பணியின்போது இரண்டாம் வத்திக்கான் சங்கத்திற்குப்பின்பு அனைத்து இனத்தவரையும் அவ்வவ்வினக்கலாச்சார பண்பாடுகளுடனேயே உள்வாங்கியது. எனவே பொங்கல் திருப்பலியில் பங்குகொள்வதில் மகிழ்ச்சியடைகின்றேன்.” என்று பொங்கல் விழாத்திருப்பலியின் முக்கியத்துவத்தையும் தமிழர்களின் பாண்பாடு, கலாச்சாரத்தையும், தமிழ்க்கிறிஸ்தவர்களாகிய நாம் எவ்வாறு வாழவேண்டும் என்பதையும் மிகவும் எளியமுறையில் அழகாக விளக்கிக்கூறியிருந்தார்.
தொடர்ந்து ஆலய மண்டபத்தில் பொங்கல் விருந்துபசாரத்துடன் இனிதே பொங்கல் விழா நிறைவுற்றது. மாலையில் எமது சகோதர பணித்தளமாகிய சன் பிலிப்பு நேரி ஆலயத்திலும் பொங்கல் விழா சிறப்பாக திருப்பலியுடன் நடைபெற்றமையும் மகிழ்ச்சிக்குரிய விடயமே. 
   
   

Contact Info

Via Bari N° 44
90133 Palermo
Italy

+39 3894205524
+39 0915072322